Skilmálar þessir gilda fyrir Norðurál ehf., og/eða Norðurál Grundartanga ehf. sem kaupanda annarsvegar og birgja þeirra hins vegar hvað varðar kaup á vöru og/eða þjónustu, hvort sem um er að ræða innkaupapöntun, þjónustupöntun, samning eða annað skriflegt samþykki Norðuráls. Í skilmálum þessum gilda eftirfarandi skilgreiningar:

• Norðurál: Norðurál ehf, og/eða Norðurál Grundartangi ehf.
• Birgir: Sá aðili sem selur Norðuráli vörur og/eða veitir Norðuráli þjónustu samkvæmt innkaupapöntun, þjónustupöntun, samningi eða öðru skriflegu samkomulagi.
• Aðili / aðilar: Með aðila er átt við Norðurál eða birgi. Með aðilum er átt sameiginlega við Norðurál og birgi.
• Innkaupapöntun / PO: Skriflegt samkomulag þar sem fram kemur tegund og magn vöru og/eða þjónustu, eins og nánar er lýst í gr. 2 í skilmálum þessum.
• Ábyrg innkaup: Innkaupaaðferð þar sem tekið er tillit til umhverfislegra og félagslegra þátta, stjórnarhátta, mannréttinda, vinnuaðstæðna, heilbrigðis og öryggis, viðskiptasiðferðis og umhverfisframmistöðu við val, hæfismat og reglubundið eftirlit með birgjum.
• UFS/ESG-mat: Skipulagt mat á frammistöðu birgis á sviði umhverfis, félagslegra þátta og stjórnarhátta. Slíkt mat getur meðal annars falið í sér EcoVadis eða annað sambærilegt og samþykkt matskerfi, sjálfsmat birgis, yfirferð gagna eða úttekt.

 

1 ALMENNT UM INNKAUP OG INNKAUPAPANTANIR

1.1. Innkaupapantanir fyrir vöru og þjónustu gilda einungis fyrir það magn, fjárhæð, vöru og þjónustu sem tiltekin er á innkaupapöntun, nema annað sé tekið fram með skýrum hætti.

1.2. Birgir skal aðeins afhenda vöru eða veita þjónustu gegn réttilega útgefinni innkaupapöntun, þjónustupöntun, samningi eða öðru skriflegu samþykki frá Norðuráli. Birgir sem afhendir vöru eða veitir þjónustu án slíks samþykkis getur átt á hættu að fá ekki greiðslu fyrir vörur eða þjónustu.

 

2 LÁGMARKSKRÖFUR TIL INNKAUPAPÖNTUNAR

2.1. Innkaupapöntun skal að lágmarki innihalda eftirfarandi upplýsingar, eftir því sem við á:

      Fyrir vörur:

• Vörutegund
• Stærð einingar og fjölda eininga
• Einingaverð, heildarverð pöntunar og flutningskostnað þar sem það á við
• Afhendingartíma
• Afhendingarstað og flutningsaðila þar sem það á við

      Fyrir þjónustu:

• Umfang verks eða þjónustu
• Skilaverkefni eða afhendingar
• Verknúmer eða kostnaðarstað
• Samþykkt tímagjald eða fast verð
• Kröfur um nauðsynleg fylgigögn
• Viðeigandi kröfur um öryggi, aðgang að athafnasvæði eða leyfi

 

3 STAÐFESTING BIRGIS Á PÖNTUN OG SKILMÁLUM

3.1. Birgir skal í sérhverju tilviki staðfesta innkaupapöntun skriflega innan 2 virkra daga eftir móttöku hennar. Staðfesting skal send með tölvupósti á netfangið innkaup@nordural.is.

3.2. Pöntun öðlast ekki gidi fyrr en við staðfestingu birgis skv. gr. 3.1 hér að ofan.

3.3. Staðfesting birgis skv. gr. 3.1. felur jafnframt í sér samþykki hans á skilmálum þessum og öðrum upplýsingum sem koma fram í innkaupapöntun.

3.4. Ef upplýsingar um vöru, þjónustu, verð eða annað sem tilgreint er í innkaupapöntun er ekki í samræmi við tilboð eða upplýsingar frá birgi skal hann án ástæðulausrar tafar hafa samband við innkaupadeild Norðuráls (sjá upplýsingar í gr. 3.1) sem mun annað hvort leiðrétta eða fella niður innkaupapöntunina.

 

4 AFHENDINGARSTAÐUR OG SKILMÁLAR

4.1. Vörur skulu afhentar og þjónusta veitt á þeim stað eða hjá þeim flutningsaðila sem tilgreindur er í innkaupapöntun.

4.2. Sé mælt fyrir um flutningsaðila skal birgir, nema annað sé tekið fram, afhenda vörur á flutningastöð hans sem staðsett er næst birgi.

4.3. Norðurál greiðir ekki sérstaklega fyrir flutning vöru frá birgi til afhendingarstaðar (flutningastöðvar þar sem það á við), nema slíkt sé sérstaklega tilgreint sem samþykktur sérliður í innkaupapöntun og er slíkur kostnaður því að jafnaði innifalinn í heildarverði pöntunar nema annað sé sérstaklega tilgreint.

4.4. Séu vörur afhentar annars staðar en óskað var eftir í innkaupapöntun, áskilur Norðurál sér rétt til þess að innheimta hjá birgi allan viðbótarkostnað sem Norðurál kann að verða fyrir vegna þess og draga frá greiðslu vegna vörukaupa.

 

5 AFHENDINGARTÍMI

5.1. Tilgreindur afhendingartími í innkaupapöntun miðast við þann afhendingarstað sem tilgreindur er í innkaupapöntun.

 

6 FRAMSAL

6.1. Birgi er óheimilt að framselja til þriðja aðila innkaupapöntun þessa í heild eða hluta, án skriflegs samþykkis Norðuráls.

 

7 PÖKKUN OG MERKINGAR Á VÖRUM

7.1. Birgi ber að búa um og pakka vörum á þann hátt að þær eigi ekki á hættu að skemmast né rýrna við flutning á tilgreindan afhendingarstað skv. innkaupapöntun.

7.2. Allar umbúðir og pakkningar skulu merktar Norðuráli og með pöntunarnúmeri innkaupapöntunar.

7.3. Öllum sendingum birgis skal fylgja pökkunarlisti og/eða reikningur.

7.4. Vörur skulu merktar með vörunúmeri eða vöruheiti birgis.

7.5. Ef um er að ræða hættulegar vörur og/eða efnavörur, þá skal öryggisblað fylgja vörunni (SDS).

7.6. Ef um er að ræða hættulegar vörur og/eða efnavörur. skulu þær að vera í viðeigandi umbúðum / pakkningum og merktar í samræmi við lög og reglur eftir því sem við á.

7.7. Birgi skal leitast við að velja umbúðir sem verja vöruna fyrir skemmdum í flutningi, eru umhverfisvænar, fjölnota og/eða endurvinnanlegar og reyna að lágmarka þær eins og kostur er.

7.8. Þar sem við á skal birgir veita Norðuráli upplýsingar um uppruna vöru, efnasamsetningu, hættuleg efni, endurunnið innihald, átakamálma eða aðrar sjálfbærniupplýsingar sem Norðurál óskar með sanngjörnum hætti eftir vegna ábyrgra innkaupa, lögbundinnar skýrslugjafar, viðskiptavinakrafna eða annarra reglubundinna krafna.

 

8 GREIÐSLUSKILMÁLAR

8.1. Norðurál greiðir reikninga fyrir vörukaup og þjónustu eigi síðar en fyrir lok næsta mánaðar eftir afhendingu vöru eða framkvæmd þjónustu, að því tilskildu að réttur reikningur berist eigi síðar en á fimmta virka degi greiðslumánaðar, nema annað sé sérstaklega samið eða tilgreint í innkaupapöntun. Ef reikningur er ekki í samræmi við pöntun getur það leitt til tafa á greiðslu. Norðurál greiðir ekki reikninga samkvæmt greiðsluseðlum. Birgir skal gera sérstakan reikning fyrir hverja pöntun eða afhendingu.

8.2. Allir reikningar vegna framkvæmda eða viðhaldsverkefna sem berast til Norðuráls skulu hafa tiltekið verknúmer/pöntunarnúmer. Gera skal sérstakan reikning fyrir hvert verk (verknúmer/pöntunarnúmer) sem unnið er. Reikningur verður ekki samþykktur nema að tiltekin fylgiskjöl fylgi reikningnum, svo hægt sé að leggja mat á réttmæti hans, s.s. samþykkt vinnutímaskýrsla, efnisskýrsla eða annað sem viðkemur greiðslu reiknings.

8.3. Á reikningi skal sýna með skýrum og aðgreinanlegum hætti stofn fyrir vinnu eða efni og hlut virðisaukaskatts. Á reikningi skal enn fremur sundurgreina heildarkostnað vegna vinnu, efnis og heildarfjölda vinnustunda. Gefa skal út reikning í þeim mánuði sem verk er unnið.

8.4. Skortur á framangreindum upplýsingum getur leitt til þess að greiðslur dragist. Á meðan á slíkum drætti stendur er Norðuráli ekki skylt að greiða dráttarvexti og/eða annan kostnað sem af honum leiðir.

8.5. Reikningar í íslenskum krónum skulu ekki innhalda aura.

8.6. Reikninga skal senda rafrænt í gegnum skeytamiðlun, á bokhald@nordural.is eða í pósti til:

Norðurál Grundartangi ehf.
Grundartangi
301 Akranes

Reikningar skulu stílaðir á viðeigandi fyrirtæki:

Norðurál Grundartangi ehf.
Kt. 570297-2609
Grundartangi
301 Akranes
VSK nr. 54495

Norðurál ehf.
Kt. 470404-2130
Skógarhlíð 12
105 Reykjavík
VSK nr. 99744

 

9 SKILARÉTTUR NORÐURÁLS Á VÖRUM

9.1. Norðurál áskilur sér rétt til að skila vörum skv. innkaupapöntun þessari til birgja innan 30 daga frá afhendingu, að því tilskildu að vörur séu ónotaðar og í upprunalegum pakkningum. Það sama gildi ef vörur, sérpantaðar og útbúnar, skv. óskum Norðuráls, standast ekki vörulýsingu sem birgir hefur lagt fram áður en pöntun átti sér stað. Norðurál skal skoða vöru svo fljótt sem auðið er og tilkynna birgi um frávik.

9.2. Ef birgir afhendir ranga vöru áskilur Norðurál sér rétt að endursenda vörurnar á kostnað birgis.

 

10 SKYLDUR BIRGIS

10.1. Birgir sem selur Norðuráli vörur eða þjónustu skal uppfylla ákvæði kjarasamninga við stéttarfélög og gildir það jafnt um verktaka og þeirra undirverktaka.

10.2. Birgir skal fara eftir lögum um aðbúnað, hollustuhætti, mengunarvarnir og öryggi á
vinnustöðum. Birgir skal einnig virða lög um meðhöndlun úrgangs.

10.3. Birgir skal sjá til þess að einstaklingar sem koma inn á eða vinna á svæði Norðuráls séu eldri en 18 ára og fylgi öryggisreglum Norðuráls: Öryggisreglur Norðuráls

10.4. Birgir skal fara að öllum lögum, reglum og viðurkenndum viðskiptasiðareglum sem eiga við um starfsemi hans, afhendingu vöru eða framkvæmd þjónustu fyrir Norðurál. Þetta tekur meðal annars til reglna um vinnuréttindi, mannréttindi, heilbrigði og öryggi, umhverfisvernd, úrgangsmeðferð, viðskiptasiðferði, bann við mútum og spillingu og annarra krafna sem Norðurál gerir með sanngjörnum hætti í tengslum við ábyrga innkaupahætti.

10.5. Birgir skal, sé þess óskað, veita Norðuráli upplýsingar, gögn eða staðfestingar sem nauðsynlegar eru til að meta hvort birgir uppfylli kröfur Norðuráls um ábyrga innkaupahætti, mannréttindi, sjálfbærni, UFS/ESG eða viðskiptasiðferði. Norðurál áskilur sér rétt til að óska eftir úrbótaáætlun eða þátttöku birgis í viðeigandi mati eða úttekt ef ástæða er til.

 

11 VANEFNDIR OG FYRIRSJÁANLEGAR VANEFNDIR

11.1. Birgir skal án ástæðulausrar tafar tilkynna Norðuráli um fyrirsjáanlegar vanefndir á skyldum sínum samkvæmt skilmálum þessum, innkaupapöntun, þjónustupöntun eða öðru skriflegu samþykki frá Norðuráli.

11.2. Ef birgir lýkur ekki UFS/ESG-mati, veitir ekki umbeðnar upplýsingar vegna ábyrgra innkaupa, innleiðir ekki samþykktar úrbætur eða vinnur ekki með Norðuráli að sanngjörnum beiðnum um úttekt, getur það talist vanefnd á skilmálum þessum.

11.3. Vanefni birgir verulega skyldur sínar samkvæmt skilmálum þessum, innkaupapöntun, þjónustupöntun eða öðru skriflegu samþykki frá Norðuráli er Norðuráli heimilt að fella niður eða rifta viðkomandi pöntun eða samningi, að undangenginni áskorun til birgis þar sem honum er veittur hæfilegur frestur til efnda, nema vanefndir séu þess eðlis að tafarlaus riftun eða niðurfelling sé réttlætanleg.

11.4. Um önnur úrræði Norðuráls vegna vanefnda birgis á skyldum samkvæmt skilmálum þessum, innkaupapöntun, þjónustupöntun eða öðru skriflegu samþykki vísast til laga nr. 50/2000 um lausafjárkaup, eftir því sem við á, og almennra reglna kröfuréttar.

 

12 GREIÐSLUÞROT BIRGIS

12.1. Norðuráli er heimilt að fella niður eða rifta öllum útistandandi innkaupapöntunum, þjónustupöntunum eða öðrum samningum við birgi við greiðsluþrot birgis, þ.e. hafi verið gert árangurslaust fjárnám hjá birgi, við greiðslustöðvun birgis, gjaldþrot hans eða aðrar sambærilegar aðstæður sem gefa til kynna að birgir geti ekki staðið við skuldbindingar sínar.

 

13 ÓVIÐRÁÐANLEGAR AÐSTÆÐUR (FORCE MAJEURE)

13.1. Hvorugur aðila skal vera ábyrgur gagnvart hinum vegna vanefnda á skyldum samkvæmt innkaupapöntun þessari ef ástæður vanefndanna má rekja til óviðráðanlegra ytri afla (Force Majeure).

13.2. Til óviðráðanlegra afla (Force Majeure) teljast meðal annars verkföll, vinnudeilur, borgaraleg ólga, náttúruhamfarir, eldsvoði, sprengingar, flóð, styrjaldaraðgerðir, viðskiptabann, flutningsbönn, almenn stöðvun á siglingum eða flutningum, fyrirmæli eða kröfur opinberra aðila, hafnaryfirvalda eða annarra stjórnvalda, eða hvers kyns ámóta atvik sem ekki er unnt að koma í veg fyrir eða hafa stjórn á með sanngjörnum ráðum af hálfu þess aðila sem fyrir varð.

 

14 VARNARÞING

14.1. Skilmálar þessir, innkaupapantanir, þjónustupantanir og önnur skrifleg samþykki frá Norðuráli skulu lúta íslenskum lögum.

14.2. Rísi ágreiningur milli aðila vegna skilmála þessara, innkaupapöntunar, þjónustupöntunar eða annars skriflegs samþykkis frá Norðuráli skal reyna að leysa hann með góðri trú og samkomulagi milli aðila. Náist ekki samkomulag skal ágreiningur rekinn fyrir Héraðsdómi Vesturlands.

 

15 PERSÓNUVERND

15.1. Ef við á vinnur Norðurál nauðsynlegar persónuupplýsingar um starfsmenn birgis í samræmi við persónuverndarstefnu Norðuráls sem aðgengileg er á heimasíðu Norðuráls: Reglur um persónuvernd