Rekstrartekjur Norðuráls námu um 102 milljörðum króna árið 2025 og nam tap félagsins eftir skatta 6,5 milljörðum króna samanborið við 2,4 milljörðum króna hagnað árið 2024.

Í október 2025 kom upp óvænt bilun í rafspennum sem varð þess valdandi að álframleiðsla á Grundartanga dróst saman um tvo þriðju hluta. Heildarframleiðsla árið 2025 dróst því verulega saman miðað við fyrra ár og var 260.155 tonn á árinu 2025 samanborið við framleiðslu upp á 308.335 tonn árið 2024. Við áætlum að full framreiðsla hefjist aftur á sumarmánuðum 2026.

Skattspor Norðuráls sýnir helstu skatta og opinber gjöld sem félagið greiðir á Íslandi, ásamt mótframlagi í almenna lífeyrissjóði starfsmanna.

Upplýsingum sem koma fram í skattspori Norðuráls er ætlað að varpa ljósi á umfang þess sem rekstur Norðuráls skilar til samfélagsins í formi lögbundinni gjalda.

Norðurál skilar ýmsum öðrum verðmætum til samfélagsins í formi launa, styrkja og viðskipta innan íslenska hagkerfisins.

Skattar og opinber gjöld 2025

Skattspor félagsins endurspeglar beint efnahagslegt framlag Norðuráls til íslensks samfélags, bæði í gegnum beina fjármuni og með launagreiðslum til starfsfólks. Á árinu 2025 námu heildarlaunagreiðslur 12,7 milljörðum króna, og meðallaun á hvert stöðugildi (án launatengdra gjalda) voru tæpar 1,2 milljónir króna á mánuði.

Samanlagt námu greiddir og innheimtir skattar ásamt opinberum gjöldum Norðuráls um 7,6 milljörðum króna árið 2025.

Skattspor Norðuráls var um 1,2 milljónir króna á hvern starfsmann árið 2025.

Heildar útflutningsverðmæti Norðuráls námu rúmum 102 milljörðum króna árið 2025. Samtals námu greiðslur til innlendra aðila tæpum 49 milljörðum króna árið 2025 eða um 49% af útflutningsverðmætum það sama ár.

Skattspor félagsins nam um 7,6 milljörðum króna árið 2025. Alls störfuðu 714 starfsmenn að meðaltali hjá Norðuráli á árinu 2025 og námu heildar launagreiðslur til þeirra 12,7 milljörðum króna. Meðallaun á hvert stöðugildi án launatengdra gjalda námu 13,9 milljónum króna á ári eða tæpum 1,2 milljónum króna að meðaltali á mánuði.

Lykiltölur úr rekstri 2025

 

ETS kerfið

Sú losun gróðurhúsalofttegunda sem er beintengd framleiðsluferli Norðuráls fellur undir viðskiptakerfi Evrópusambandsins með losunarheimildir (ETS). Markmið þess er að draga úr losun frá framleiðslu stærri iðnfyrirtækja í Evrópu þar sem fyrirtækin þurfa að kaupa losunarheimildir. Viðskiptakerfið virkar því sem hagrænn hvati fyrir iðnfyrirtæki til að draga úr losun.

 

Heiðarleg viðskipti

Century Aluminum Company, móðurfélag Norðuráls, og öll tengd félög skuldbinda sig til þess að hlíta ströngustu kröfum um heiðarleika, siðferði og ráðvendni í viðskiptum. Stjórnendum eru settar siðareglur til að sporna við óheiðarleika og siðleysi í háttsemi og stuðla að því að öll starfsemi félagsins standist þessar kröfur.

Starfsfólk má ekki leyfa, bjóða, lofa né veita greiðslur í reiðufé eða öðrum verðmætum, beint eða gegnum þriðja aðila, til opinberra embættismanna eða starfsfólks fyrirtækis í einkageiranum, né til maka, sambýlisaðila, barns eða annars skyldmennis neinna slíkra aðila í þeim tilgangi að hafa áhrif á eða umbuna fyrir gjörðir eða ákvarðanatöku slíkra aðila eða til að öðlast ávinning.

Hagaðilar og starfsfólk geta á auðveldan hátt tilkynnt um grun á broti til regluvarðar generalcouncel@centuryaluminum.com eða nafnlaust gegnum tilkynningakerfi óháðs þriðja aðila, Ethical Advocate. Tilkynningar má senda allan sólarhringinn, alla daga, með því að hringja í síma 800 9610. Í kjölfar tilkynningar er hrint úr vör rannsókn innanhúss.

Við gerum þá kröfu að allir birgjar og samstarfsaðilar Norðuráls, hvort sem um er að ræða viðskiptavini, verktaka, umboðsmenn eða ráðgjafa, starfi af heilindum og ástundi heiðarleg viðskipti.