Starfsleyfi

 

Álver Norðuráls á Grundartanga hefur starfsleyfi fyrir framleiðslu á allt að 350 þúsund tonnum af áli. Starfsleyfið var gefið út af Umhverfisstofnun 16. desember 2015 en stofnunin er jafnframt eftirlitsaðili með starfsemi fyrirtækisins. Starfsleyfið gildir til 16. desember 2031 og er veitt í samræmi við ákvæði reglugerðar nr.785/1999 um atvinnurekstur sem getur haft í för með sér mengun. sjá hér

 

Rannsóknir og eftilit með umhverfisáhrifum Norðuráls á Grundartanga eru framkvæmdar af óháðum aðilum. (Niðurstöður þessara rannsókna má finna undir flipanum Skýrslur í dálknum hægra megin.) Þær sýna að áhrif á lífríki í nágrenni fyrirtækisins eru og hafa verið hverfandi. Þessi árangur er ekki sjálfgefinn og til að hann náist þarf reksturinn að vera góður og í jafnvægi. Það kallar á liðsheild og kunnáttu starfsfólks Norðuráls.

 

Norðurál er með vottað gæðastjórnunarkerfi samkvæmt alþjóðlega ISO 9001staðlinum. Þá eru  umhverfisstjórnunar- og öryggisstjórnunarkerfi fyrirtækisins vottuð samkvæmt ISO 14001og OHSAS 18001stöðlum. 

 

Hugvit í stað handafls

Í nútímalegu álveri eins og hjá Norðuráli byggist framleiðslan á háþróaðri tækni. Þekking, hugvit og kunnátta hafa leyst handaflið af hólmi. Framleiðsluferlið er tölvustýrt, tækjabúnaður er að hluta hátæknilegur og gerðar eru ríkar kröfur til færni starfsmanna sem fylgjast með ferlinu og grípa inn í ef þörf krefur. Álver eru þannig gott dæmi um hvernig rótgrónir atvinnuvegir geta nýtt sér það besta sem tæknisamfélagið býður upp á til að auka afköst, gæði og öryggi framleiðslunnar.