Öryggi

 

Hjá Norðuráli eru öryggismál forgangsatriði. Allir starfsmenn og verktakar eru upplýstir um skyldur sem varða heilsu þeirra og öryggi og séð er til þess að allir fái næga fræðslu og þjálfun til að uppfylla þessar skyldur. Jafnframt er ætlast til þess að hver og einn leysi verk sín af hendi í samræmi við öryggiskröfur og sé ávallt hæfur til sinna starfa. Öryggi í starfi og árvekni gagnvart öryggi vinnufélaganna eru skilyrði til starfa hjá Norðuráli og forsenda góðs vinnuanda.

 

Íslenska leiðin 

Norðurál hefur frá upphafi haft þá sérstöðu að velja íslensku leiðina sem felst í því að taka mið af íslensku aðstæðum við uppbyggingu fyrirtækisins og gæta þess að það dafni í sátt við íslenskt samfélag. Norðurál hefur skipt vexti fyrirtækisins í áfanga og brotið framkvæmdir niður í viðráðanlegar einingar fyrir íslenskt efnahagslíf og fyrirtæki. Þessi stefna auðveldar innlendum aðilum að taka að sér framkvæmdir og nota innlent vinnuafl. Fyrirtækið nýtir íslenskt hugvit og þjónusta er keypt af innlendum verkfræðistofum, byggingaverktökum, flutningafyrirtækjum, ráðgjafastofum og bönkum.