Kerskálar

 

Framleiðsla á áli í álverinu á Grundartanga fer fram í fjórum kerskálum. Í kerskálunum eru samtals 520 ker með forbökuðum kolaskautum. Kerin eru lokuð og tengd reykhreinsivirki sem hreinsar útblástur frá þeim. Í kerskálunum eru þjónustukranar sem þjóna kerunum. Kranarnir eru notaðir til að skipta um skaut, við áltöku og við áfyllingu álflúoríðs. Lokað þéttflæðikerfi flytur súrálið frá geymslusílói við höfnina til keranna í kerskálunum.  Í kerunum eru brjótar sem brjóta gat á raflausnarskurnina svo að matarar, sem eru notaðir til að bæta bæði súráli og álflúoríði í kerin, komi efnunum frá sér. Rafmagnið sem fer um raflausnina í kerunum veldur því að súrál klofnar í súrefni og hreint ál. Kolaskaut í kerunum eyða súrefninu með bruna. Ferlinu í kerunum er stjórnað með VAW ELAS tölvustýrðu stjórnkerfi.

 

 

Ál og mannvirki

Brýr, gríðarstór þök, hvolf yfir verslanamiðstöðvar og íþróttahallir eru dæmi um mannvirki þar sem ál er notað. Ál er líka ákjósanlegur kostur í burðarvirki, klæðningar, stiga, handrið, gluggakarma, hurðir og hurðahúna og klæðningar innanhúss. Að ekki sé talað um loftræstikerfi. Ál hefur einnig sannað ágæti sitt við viðhald gamalla og jafnvel sögufrægra bygginga. Þar eru möguleikarnir óþrjótandi.