Ábyrgð, öryggi og
hagkvæmni

Norðurál framleiðir ál samkvæmt þörfum viðskiptavina á ábyrgan, öruggan og samkeppnisfæran hátt. Gæðastjórnunarkerfið er rýnt reglulega og endurbætt. Lögð er áhersla á gæðavitund starfsmanna og að þeir taki virkan þátt í stöðugum umbótum.

Við lítum á öryggi og heilsu starfsfólksins sem okkar mikilvægasta verkefni á hverjum einasta degi. Norðurál er stærsti vinnustaður Vesturlands og gegnir mikilvægu hutverki í samfélaginu – ekki aðeins fyrir efnahag og velferð þeirra fjölmörgu sem starfa hjá okkur og með okkur, heldur einnig lífsgæði, umhverfi og efnahag landsins í heild. Fyrirtækið leggur áherslu á hlutverk sitt sem ábyrgur þegn í samfélaginu og uppfyllir lög og reglur sem snúa að starfsemi fyrirtækisins.

Gæðamarkmið Norðuráls:

Ábendingar og tilkynningar

Við hvetjum starfsfólk til að koma á framfæri hvers kyns ábendingum og athugasemdum sem tengjast umhverfismálum. Þær eru skráðar og unnið er með úrbætur. Alls bárust 34 tilkynningar og ábendingar á árinu 2017.

Það má líkja þessu fyrirkomulagi við „Mamma þín vinnur ekki hér“-kerfið, sem minnir starfsfólk á góða umgengni á kaffistofunni. En hjá okkur eru „bollarnir“ allt að 30 tonn á þyngd, ísskápurinn er fyrir 600 manns og við mælum efnisafganga í tonnum. Með árvekni og vitund um áhrif okkar á umhverfið getum við bætt okkur jafnt og þétt í stóru sem smáu.

Ábyrg nýting hráefna og aukin þekking starfsfólks

Norðurál framleiðir ál á umhverfisvænan hátt og leggur áherslu á að starfsemi fyrirtækisins sé í sátt við umhverfið. Stöðugt er unnið að lágmörkun umhverfisáhrifa ásamt ábyrgri nýtingu orku og hráefna.

Árið 2018 verður lögð sérstök áhersla á aukna þekkingu starfsfólks á umhverfisáhrifum starfseminnar. Áhrif allra starfa á umhverfið verða rýnd og sett fram áætlun um kynningu til allra starfsmanna á þeim. Umhverfisstefna fyrirtækisins verður kynnt öllum starfsmönnum. Við erum sannfærð um að margt smátt geri eitt stórt og að saman getum við náð umtalsverðum árangri til hagsbóta við umhverfið.

Verulegur árangur náðist á árinu 2017 með skipulegri gagnasöfnun vegna árlegrar ETS skýrslu, skilgreindri eftirlitsáætlun með afsogsvirkjun utan kerskála og skilgreiningu á orsökum ryklosunar í steypuskála. Starfsfólk var hvatt til að samnýta bíla og kynnt viðbragðsáætlun við umhverfisóhöppum.

Sérstök áhersla var lögð á greiningu á helstu stærðum úrgangs og að minnka magn óflokkaðs úrgangs milli ára. Gengið var frá samningum við nýjan þjónustuaðila um sorphirðu, flokkun og förgun.

33 nemendur frá Norðuráli voru við nám í stóriðjuskólanum árið 2017. Skólinn, sem hefur þegar útskrifað 127 nemendur, gegnir sífellt mikilvægara hlutverki í viðhaldi og eflingu þekkingar og færni starfsfólksins okkar.

Aukin endurnýting og ábyrg förgun

Norðurál stuðlar að aukinni umhverfisvitund og þátttöku starfsfólks í umbótastarfi. Allt starfsfólk Norðuráls fær bónusgreiðslur sem eru m.a. tengdar frammistöðu fyrirtækisins á sviði umhverfismála.

75% af öllum úrgangi sem til fellur við framleiðslu álversins eru endurunnin og erfitt að auka það hlutfall miðað við þá tækni sem notuð er við álframleiðslu. Þess vegna stefnum við að því að að draga úr hlutfalli óflokkaðs úrgangs á öllum starfsstöðvum Norðuráls. Einnig hvetjum við starfsfólk og gesti Norðuráls til að nýta hleðslustöðvar fyrir rafbíla sem komið hefur verið upp. Að sama skapi hefur hlutfall rafbíla innan fyrirtækisins verið aukið; jafnt lyftara sem annarra farartækja.

Jafnrétti, traust og fjölskyldugildi

Hjá Norðuráli starfa um 600 manns úr öllum áttum. Vinnustaðurinn er fjölþjóðlegur og við leggjum sérstaka áherslu á heilbrigðan og góðan starfsanda. Við styðjum okkar fólk til endurmenntunar, starfsþjálfunar og þróunar í starfi.

Jafnrétti

Norðurál leggur áherslu á jafnan rétt kvenna og karla í störfum hjá fyrirtækinu. Gæta skal jafnréttis milli einstaklinga óháð kynferði, kynhneigð og uppruna. Þess skal stöðugt gætt að lögum um jafnrétti kvenna og karla sé fylgt.

Laus störf

Laus störf hjá Norðuráli standa opin jafnt konum sem körlum. Talsverður kynjahalli er enn til staðar en markmiðið er að ekkert starf geti talist sérstakt kvenna- eða karlastarf.

Launajafnrétti

Launakjör starfsfólks Norðuráls eru óháð kyni og þess skal jafnan gætt að konur og karlar njóti sömu kjara fyrir sambærileg störf. Fylgst er nákvæmlega með þessu og brugðist við öllum frávikum.

Einelti og kynferðisleg áreitni

Hjá Norðuráli er lögð áhersla á góð samskipti. Ólíkum einstaklingum er sýnt umburðarlyndi og fordómar eru ekki liðnir. Tekið er á vandamálum sem upp koma og viðbrögð eru markviss. Einelti og kynferðislegt áreitni eru undir engum kringumstæðum liðin á vinnustaðnum.

Samræming fjölskyldu og atvinnulífs

Norðurál ber virðingu fyrir skyldum starfsmanna gagnvart fjölskyldum sínum. Starfsfólk eru hvatt til að taka fæðingar- og foreldraorlof.

Öll saman!

Heilbrigði og öryggismál

Öryggi starfsfólks er í forgrunni á árinu 2018 með umfangsmiklu átaksverkefni sem miðar að því að bæta árangur okkar í öryggismálum og öryggismenningu á öllum sviðum og öllum starfsstöðvum fyrirtækisins.

Slagorð átaksins – Öll saman! – vísar til þess að öryggi er samstarfsverkefni okkar allra. Við gætum hvers annars og hjálpumst að við að leysa hvers kyns verkefni með skynsamlegasta og öruggasta hætti. Við leggjum sérstaka áherslu á uppbyggileg samskipti á vinnustaðnum, þar sem starfsfólk nýtir reynslu sína og þekkingu til að leiðbeina félögum sínum og bestu lausna er leitað í sameiningu.

Starfsfólk Norðuráls og fjölskyldur okkar eru það verðmætasta sem við eigum. Þess vegna gætum við hvert annars og og styðjum í öllum verkum. Við komum heil heim hvern einasta dag, því öryggi er okkar fyrsta verkefni. Það verkefni leysum við öll saman.

Gæðastjórnunarkerfi Norðuráls er vottað samkvæmt alþjóðlega ISO 9001 staðlinum. Umhverfis- og öryggisstjórnunarkerfi Norðuráls eru vottuð samkvæmt alþjóðlegu ISO 14001 og ISO 18001 stöðlunum. Stöðugt endurmat og endurbætur á ferlum fyrirtækisins á sviði umhverfis- og öryggismála er tryggt.

Norðurál heldur grænt bókhald í samræmi við reglugerð nr. 851/2002 og skilar því endurskoðuðu til Umhverfisstofnunar fyrir 1. maí ár hvert. Einnig er fært útstreymisbókhald í samræmi við reglugerð nr. 990/2008. Ef einhverjar spurningar vakna við lesturinn er upplagt að senda þær á netfangið umhverfi@nordural.is og munum við reyna að svara þeim eftir bestu getu.

Við erum líka á facebook.